خبرلرده اوخودوم:
محمدرضا سرشار سه‌شنبه آخشامی، دئی آیی‌نین اون دؤردونده، محمدرضا بایرامی‌نین «یاشیل باغین اؤلولری» رومانی‌نی نقد ائتمیشدی.
بو رومانی اوخومامیشام. دوغروسو اوخویا بیلمه‌میشم. رضا امیرخانی‌نین «یاشیل باغین اؤلولری» رومانی اوزه‌رینده سؤیله‌دیگی سؤزون گؤره‌نده کی اونو بو نئچه ایل بویوندا یازیلان رومانلارین ان یاخشی‌سی بیلمیشدی، بیر نئچه وقت بو کیتابین توقیفیندن کئچمیشدی.
پهلوی آریاپرستلر سبکینده اونو دانلیانلارین جاوابیندا یازیلان بایرامی جینابلاری‌نین سؤزون اوخودوقجا، آرتیقراخ بو کیتابی اوخوماغا ماراقلاندیم.
هله‌لیک بو یازیدان غرضیم بئله بیر سؤزلر دئییل. تکجه سرشار جینابلاری‌نین نقدی‌نین سون پاراگرافی بیر نئچه سؤز آرایا گتیریر.
سرشار جنابلاری ناغیلین دیلینه ایشاره ائدرکن دئییب:
«بو ناغیلین دیلی چوخ ایشکاللی دیر. آلتمیشا یاخین یانلیش بو اثرده واردیر. میثال اوچون، یازیجی بیر یئرده یازیر: «او دوه نالبنده باخان کیمی باخدی (او مثل شتری که به نعلبندش نگاه کند، نگاه کرد) بیرحالدا کی دوه‌نین دیرناغی یوخدوکی نالی‌دا اولسون یا کندلی بیر آدام، بو اثرده آت ایله اینک تزه‌کینه، «پشگل» دئییر. بو کیتابدا حیروفی ایضافه دن، تورکجه شیوه‌سینده فارسجادا یارارلانیلیب.»
دئییرم، «دوه نالبنده باخان کیمی» ایران تورکلری آراسیندا چوخ تانینمیش بیر مثلدی. ائله دوه‌نین دیرناغی اولماماغی، اونو ناللیان آدامین آخماغلیغین یئتیریر. اونا گؤره ده دوشونجه‌لی دوه بو آخماق نالبنده اوجور باخیر. دوغروداندا چوخ تأسفله گرک دیه‌ک سرشار جینابلاری تک سایین بیر اوستاد، اؤزو ده دیلی تورکجه اولان بیر آدامین رومانین نقد ائدنده، یئنه ده اؤزوده آذربایجاندا کئچن بیر رومانی نقد ائدنده، نئجه دی هئچ گرکلی گؤرمور تورکجه‌ده ایشله‌نن ان ایلکین مثللری تانیسین و بئله عجیبه اؤزونه گوه‌نمکله او مثلی، یازیجی‌نین یالنیشی آدلاندیریر!
No comments:
Post a Comment